Malam cako, galak manih tibo tibo hilang dari wajah gagah Ajo Iben. Katua geng pamanangan Tek Ira ko banyak diam
Muko gagahnyo sajak sanjo alah balipek co baju nan alun basatarika, talingonyo merah co udang di panggang
Ciek, duo, tigo sampai ampek panggilan dihapenyo nyo caliak sajo dek mando Rang Batu Loyo tu.
”Kalera, den kumpuaan anak anak untuk makan lamak di kadai dakek alun alun tu, eh Etek Ndak satuju. Kok untuak urang lain bagagehnyo,” Ajo Iben manggarutok baturo turo.
”Apo lai Jo, jan berang berang ndak bakatantuan men,” Yuang Arab mancubo batanyo jo logat Agam nyo.
”Batua kato adiak kito Yuang Arab Jo, mareh mareh hanyo mambuek Kapalo sakik,” Sutan Rajo Pena nan asli Solok sato pulo batanyo dengan dialek Soloknyo.
Ajo Iben hanyo senyum simpul hampia ndak tampek. Walau ndak ado komen, kaduo konco Ajo Iben tu yakin si ketua geng mulai tanang.
”Baa ndak ka tabik suga den, taragak aden manyanangkan anak anak tu di kadai dakek alun alun, eh nyo tolak gagek dek Etek tu,” akhianyo Ajo Iben mangecek juo.
”E itu, Iyo tu Jo. No ndak nio kalua pitih untuak Kito. kok untuak nan lain kalua kampia e,” jawek Ajo Iben tanyato mampu mamanciang rabo Yuang Arab nan asli Padang Tarok tu.
”Ha, ha, ha Baa kok sato pulo Adiak baturo turo, kok mode tu kurenahnyo pabiaan sajo lah,” larai Sutan Rajo Pena.
”Atau mode iko sajo, awak kan urang Minang. Ibaraik urang manggiliang lado, kalau kurang di bawang, Kito labiahkan tomatnyo,” Rajo Pena mausul.
”Rancak juo usul Uda Sutan tu, tapi baa caroe,” Yuang Arab nan mukonyo panuah garembeh, tagalutiak batanyo.
”Iko nan ambo suko jo Dunsanak Rajo Pena, kaluakanlah pandapektu,” Ajo Iben bakato sambia marapek.
Katigo konco palangkin nan satu geng tapi babeda nasib tu pun duduak di meja ketua geng eh Ajo Iben untuak mandanga usul Sutan Rajo Pena nan manuruik kaduonyo, acok di lua logika.
Sasudah mancaliak suok kida dan manuruik pintu sarato horden jandela, Rajo Pena bakato babisiak nyaris ndak tadanga
”Kok ndak bisa makan lamak di lua, awak turuik sajo kandak Etek tu untuak rapek di kantua. Tapi kito proyek an,” kato Rajo Pena serius.
”Baa caro’e,” Ajo Iben dan Yuang Arab batanyo serentak
”Kito mainkan anggarannyo, awak pasan nasi 10 bungkuih, kito laporkan 15,” kato Rajo Pena.
”Satuju,” kato kaduo koleganyo serentak jo muko nan mulai badarah baliak.
”Kok baitu, salain nasinyo dilabiahan, haragonyo pun dinaiak kan,” Ajo Iben bakato jo muko nan panuah bintang.
”Ha, ha, ha. Dek kito nan paliang mudo, kito picayo sajo, nan penting kok ditanyo Malaikaik kito akan jawek iko proyek basamo untuak manambah isi saku,” jaleh Yuang Arab galak sengeang.
”Ambo juo samo, iko kan proyek Sutan Rajo Pena, itu jawek ambo ka Pak Malaikaik,” baleh Ajo Iben.
Sutan Rajo Pena nan tasuduik, ndak kehilangan aka, jo galak manih inyo manjawek.
”Proyek ko adolah proyek basamo nan tantu tanggung jaweknyo ado di ketua geng,” katonyo diplomatis.
Akhianyo, katigo konco palangkin tu galak sagalak galaknyo karano Ajo Iben nan awalnyo paniang cando ciliang sakik, kini alah galak manih, samanih tabu nan tumbuah di tapi sawah. ***









