Hujan turun tiado hanti, sajak pagi sampai sanjo hari. Yuang Bondek nan mandapek amanah mamuta kayu bulek alias supir di posko kamanangan Tek Ira manggauik gauik kapalonyo nan mulai sulah.
Dari balakang ka muko, dari onda ka oto, yo lah bantuak urang tenggen paja ko.
Paruiknyo nan mulai buncik jo baju nan mulai sampik, mampatontonkan pusek Yuang Bondek nan bulek tabudua.
Sasakali nyo isoknyo rokok karetek nan didapek hasil mintak ka Sutan Rajo Pena. Iduangnyo nan pesek, sasakali mangaluakan asok alah sarupo jo kapalo kareta mandakia Padang Panjang nan tahanti di Pandai Sikek.
”Boss, manga kito lai,” sambia mauruik paruik bunciknyo. Yuang Bondek batanyo ka Rajo Pena.
”Balagu sajolah kito, mumpuang hujan sambia manunggu hujan taduah,” kato Rajo Pena manjawek.
”Boss, kalau juragan Ajo Iben jo juragan Buyuang Arab indak ado, tanyato langang juo,” muluik Yuang Bondek taruih bakicau.
Yuang Bondek mulai manyusun alat alat karaoke. Usulan Rajo Pena batua batua singgah di kapalonyo nan mulai sulah dek acok digauik.
Yuang Bondek memang tipe anak buah kreatif, basamo si Kujang, inyo mangarajoan tugeh nan ado.
Kalau indak kayu bulek nan diputanyo, maangkek bareh jo minyak jadi juo. Malah inyo tanpa sungkan santiang pulo mancuci, buktinyo sarawa kolornyo nan dibali di zaman japang, utuh sampai kini walau di bara posisi tabuak maintai.
Salasai persiapan balagu, Yuang Bondek mulai balagu. Dari lagu barat, lagu top sampai lagu dangdut, kasadoe disosoh Yuang Bondek tanpa malu walau sasakali kantuik tanpa permisi kalua dari lubang ikua Yuang Bondek nan alah bocor.
Rajo Pena jo si Kujang nan batugeh manunggu rumah jo mambarasiahannyo, galak sengeang jo tingkah Yuang Bondek nan taruih bakicau dengan suaro piriang pacahnyo. ***









