BADANNYO samparono gadang, kok tingginyo indak sabara, tapi urusan Sumatera Tangah, namuah batenju inyo kalau ndak dapek.
Sepak sentuang kalau mangulek. Kasadonyo dilantuang, kunyah kenyoh garamannyo manjadi hiburan nomor satu paja bondek ko.
Kalau disuruh karajo, ado sajo alasannyo. Mulai dari badannyo nan angek dingin, kapalonyo nan sakik sampai anjing paburunyo nan alun di agiah makan.
Tapi kalau sempat ndak diagiah tau urang makan lamak, yo namuah mangguguah paja ko.
Walau bantuak mode petinju, angker, ganas dan sunguik tipih bapilin, tapi kalau alah bacarito, alamak manjadi amak – amak rempong tingkahnyo.
Kasado dicaritoan, mulai tantang kehebatannyo, kasantiangan inyo sampai persoalan induak barehnyo nan suka msmparanak an pitih.
”Walau badan paja tu gadang, tapi alun sagadang otanyo nan indak bakarunciangan. Sudah tu suko maangek urang untuak bakuhampeh,” kato Ajo Iben mancaritokan parangai Si Am Kompeni.
Buyuang Arab jo Rajo Pena nan jadi pandanga terbaik, hanyo manyimak dengan seksama.
Indak menyela, indak mambantah pun indak batanyo. Karano kaduonyo paham sangaik kurenah dan parangai Si Am Kompeni.
Si Am Kompeni nan satangah parewa, subananyo punyo kapandaian mamuta kayu bulek, tapi profesi tu hanyo dikarajoannyo kalau ado nan maajak.
Kalau giliran indak diajak kawannyo, Si Am Kompeni nan baru sajo kamatian bini, labiah banyak baru uru ndak jaleh tujuannyo.
”Kalau alah maota, ndak jaleh urang nan ka tadingguang dek nyo. Bagi Si Am, asa lai muncuangnyo mangenyam dan mangulek, indak peduli ota tu mambuek urang basiarak,” kato Ajo Iben malanjuikkan caritonyo.
Walaupun tukang garegak dan tukang pakang sarato tukang kolak, Si Am Kompeni ko takanai galehnyo katiko mampacaruikkan parewa di ujuang balai-balai.
”Indak sakadar kucun talingonyo, Si Am Kompeni tabang hambua malarikan diri. Tapi ka kito disabuiknyo ado lokak nan dikarajoan,” Rajo Pena manambahkan.
”Kok ka gadang ota dan ka manggaregak urang, jan bamental karupuak,” tukuak Yuang Arab.
Katiko sadang sero mancaritokan kurenah Si Am Kompeni, azan Asyar tadanga dari surau nan ndak jauah dari katigonyo maota.
”Sumbayang kito dulu, carito Si Am Kompeni beko sajo dilanjutkan,” Rajo Pena maingek an kawannyo sambia maurak selo. ***









