IKO bukan carito sumbarang carito, tapi carito nan indak jaleh ujuang pangkanyo.
Antah siapo nan bacarito, antah dimano pulo inyo bacarito atau baa pulo dampak caritonyo.
Nan jaleh carito ko kambang dari muluik ka muluik bacando kanai galigato, makin digauik makin batambah gatanyo.
”Carito ulek urang katokan, karano topiknyo bacando ulek pulo, baganti musim baganti pulo rononyo,” Ajo Iben mulai bakatubah tantang hal – hal nan indak bakajalehan tu.
Musim pilkada, apak Iko nan gagah, apak Iko nan santiang. kalau musim pileg, galehnyo barubah dan junjuangan inyo pulo nan samparono hebat.
Tapi katiko musim bancano nan datang, sumpah caraco nan kalua dek penanganan ndak sasuai kandaknyo.
”Sayangnyo. wakatu manyumbang pitih saribu cabiak juo nan bamasuak-an,” lanjuik Rang Piaman ko galak sengeang.
Hal itu manuruik Ajo Iben, juo tajadi di nagari antah barantah ko.
Katiko apak ko lah manang lomba, kasadonyo sibuk mauruik pungguang, sibuk mancari aia dan mancaritokan sagalo carito nan indah.
Indak surang juo nan indak mamuji, yo samparono hebat muluiknyo maumbar kato.
”Nan aneh, kasadonyo mangaku tim sukses sahinggo paralu diapresiasi. Baiak dalam bantuak jabatan, proyek atau saindaknyo jadi pamandu sorak,” tukuaknyo.
Walau indak surang juo urang di kadai nan marespons, Ajo Iben taruih juo mangecek sarupo guru nan sadang basitungkin di papan tulih.
”Untuak mancari muko, nan kalah dipagunjiangkan dan indak ado nan elok karajonyo,” katonyo.
”Mamuji tantu indak dilarang asa objektif dan sasuai fakta, tapi nan rumik justru bapijak duo kaki atau bahaso kerennyo coki duo nokang,” Yuang Arab nan mukonyo mulai indak jaleh dek garembehnyo, indak saba pulo mambalehnyo.
Kalau si A nan manang, dikatokan jariah payahnyo, tapi katiko si B nan manang, si B dipuji satinggi langik.
”Yo bana cando ulek karajonyo, ciek digigik, ciek lai tampek bagantuang,” Rajo Pena manambahkan.
Baitulah jadinyo kalau kasadonyo ingin manjadi pahlawan. Katiko disasak-an program Angku Palo nan didukuangnyo alun jalan, hatinyo nan sakik.
Padohal indak ado sangkuik pauiknyo jo inyo. Tapi kalau program tu alah dikarajoan, walau wakatunyo jauah panggang dari api, nyo bae manapuak dado dan basorak sapanjang nagari, indak paduli paneh garang ataupun hujan patuih tatap inyo basuaro.
”Iko program Angku Palo den,” katonyo baulang-ulang.
Yo samparono kurenahnyo. Mungkin dek iko carito ulek, mungkin manjadi ulek sajo labiah rancak untuak inyo. ***









