ALAH duo hariko, Ajo Iben indak kalua rumah. Hanyo baguliang ka suok, baguliang ka kida sambia maelo salimuik supayo indak lapeh dari badannyo.
Urang Sumando Malanca tu, indak sajo maleh kalua biliak. Paruik litak mintak diisi pun ditahannyo. Sarupo itu bana maleh Ajo Iben.
Malah katiko talepon Da Sul untuak rapek pun indak dihiraukannyo samo sakali.
Karano Ajo Iben tau, kalau talepon diangkek, ndak ado alasan untuak indak tibo.
Rusuah bininyo ndak dipikiakan dek Ajo Iben karano dingin nan manjadi – jadi di sakujua tubuahnyo.
”Dek apo Ajo subananyo, alah denai buekkan teh talua, indak baminum. Denai baokkan nasi indak pulo balulua. Kok mode iko, tantu denai juo nan seso,” kato Siti Zaenab lamah lambuik.
”Atau ka denai kerok Ajo saroman urang Jawa tu,” lanjuik Zaenab memberi solusi nan manuruiknyo paliang rancak.
Ajo Iben hanyo diam, indak basuaro samo sakali. Malah salimuiknyo nan dielo dek Ajo Iben.
Sikap Ajo Iben itu, ruponyo diartikan lain dek Siti Zaenab. Karano apo yang dibuek hanyo dicaliak sajo, malah tanyo pun indak dijawek samo sakali.
Rusuah Siti Zaenab makin manjadi katiko gigi Ajo Iben mulai baradu manahan dingin. Salain itu, ayah pajanyo itu mulai manggigia saroman urang dek kuro.
”Ondeh Jo, jan buek denai takuik. Atau bialah denai japuik Pak Mantari sabanta, bia dipareso, kapan paralu disuntik supayo Ajo capek sihaik,” tutur Siti Zaenab pula.
Ruponyo mandanga ka disuntik, tabik pulo takuik Ajo Iben. Salimuik dibukak, langsuang tagak dari laloknyo.
”Ndak paralu Mantari, aden alah sihaik,” kato Ajo Iben nan memang takuik jo jarum suntik. ***









