IKO lanjutan carito tantang raun paniang, bukan manyangkuik Malanca nan cah raun cah singgah.
Tapi carito ko takaik urang sumandonyo Ajo Iben nan ka reuni jo kawan lamonyo. Bukan Buyuang Arab, bukan Rajo Pena, apo lai bahubungan jo Da Sul.
Kawan ko banamo Ciwil nan manggaleh beha sarato sarawa dalam padusi di kawasan Tanah Abang.
Subananyo hubungan antaro Ajo Iben jo Ciwil ko, tidak baik-baik saja, kato paja – aja kini. Sahinggo agak aneh katiko Ajo Iben mangatokan ka induak barehnyo ka manamui Ciwil.
”Iyo bana Ciwil tu manunggu di sinan, takuiknyo beko, Ajo masuak lukah,” kato Piak Reben maingek maagiah tau.
Piak Reben masih ingek rayo duo tahun lalu, katiko acara reuni sakola, ayah pajanyo tu dipateakan dek Ciwil.
Ajo Iben nan urang surau, diagiah minum Ciwil tuak nan dibalinyo dari Ucok di pangka jambatan.
Alhasil, Ajo Iben paniang – paniang lalek dibueknyo. Walau indak pingsan dek aia cilako tu, tatap sajo muncuang Ajo Iben baruok cando kudo bendi lupo diagiah minum.
”Jan murah bana baburuak sangko, ndak salamonyo urang tu jaek ka kito,” Ajo Iben menasehati amak pajanyo.
”Tasarah Ajo lah, kok tajadi apo – apo, usah salahkan denai,” kato Piak Reben marajuak.
Akhianyo, dengan sumangek ampek limo ditingkah jo raso badunsanak nan indak lakang dek hujan dan indak lapuak dek paneh, Ajo Iben barangkek ka Kabum Bawang.
Nah. nah, nah. Persoalan baru tibo katiko Ajo Iben sampai di daerah nan dituju. Ajo Iben indak diagiah tau dek Ciwil alamat lengkapnyo.
Ajo Iben nan alah bapaluah dek bajalan taingek jo pasan Ciwil.
”Kok angku sampai di Kabun Bawang, ketik sajo di google namo Ciwil Kabun Bawang karano sinyal telepon kurang rancak karano banyak gaduang – gaduang tinggi,” kato Ciwil wakatu kaduonyo basuo di acara halal bihalal urang Sungai Limau tahun lalu.
Ajo Iben pun manjalankan instruksi kawan bacakaknyo katiko ketek itu tanpa ragu samo sakali.
”Ciwil, Kabun Bawang,” tulih Ajo Iben.
Indak manunggu lamo, masuak pasan dari makhluk antah berantah itu.
”Ciwil Kabun Bawang apo? Bawang Merah, Bawang Putiah, Bawang Bombai atau Bawang Perai?” jawek google.
Ajo Iben nan indak manyangko mandapek jawaban sarupo itu, lalu mambaleh dengan keyakinan panuah.
”Bawang Merah,” Ajo Iben baliak manulih.
”Bawang Merah nan baru ditanam, baru disiang atau nan kadijua,” kumbali makhluk jadi-jadian itu mambaleh.
Ajo Iben nan mulai tabik suganyo, masih malanjuik an manulih kalimat, ” Bawang Merah nan kadijua,”.
Ondeh Uwaik, ruponyo angku google indak mau kalah. ” Bawang Merah ukuran ketek, sadang atau gadang”.
Ajo Iben nan alah naiak darah, manulih dengan hati berang.
”Tasarah waang sajolah,” tulih Ajo Iben.
Eh tanyato urang nan di WA manulih pulo, ” Ha ha ha, emang enak dikadalin,”
Sambia manggarutok dek sakik hati, Ajo Iben baliak kanan sambia mambantiang hape sekennyo ka tembok nan indak basalah.
“Kalera,” kato laki Piak Reben tu batere tere ****









