Mak Garembeh, Ajo Manih sarato Sutan Bandaro sadang raun paniang. Katiko paruik sadang mangareok mintak diisi, masuak panggilan ka hape Ajo Manih.
”Yo Da, kami ka situ,” walau Ajo Manih bacarito sapanjang tali baruak, hanyo itu nan taingek dek Mak Garembeh dan Sutan Bandaro.
”Sia Jo,” Sutan Bandaro nan karajonyo tukang cataik, batanyo panuah salidik.
*Da Boy, gaek tu taragak basuo,” baleh Ajo Manih.
”Tau sajo Da Boy, kalau paruik ko alah bacaruik caruik mintak diisi,” Mak Garembeh manjawek kato Ajo Manih.
Urang batigo nan alah jadi bestie ko, bagageh maayun langkah ka tampek Da Boy manunggu.
Sampai di tampek nan dituju, Da Boy mambukak carito sarato mambari arahan manyangkuik apo apo sajo nan kadikarajokan konco palangkin,
Alun salasai Da Boy dengan katubahnyo, Mak Garembeh bainisiatif mamasan makanan.
”Piak,” Mak Garembeh mamanggia sambia manggubik urang kadai nan ado didakeknyo.
”Iyo Uda, Uda pasan apo,?” Si Upiak nan manjago kadai batanyo malu malu muko.
”Apo makanan favorit di siko? Mak Garembeh langsuang batanyo dek paruiknyo lah mamakiak manahan litak
”Kasiva Da,” jawab Upiak Kadai nan didadanyo tatulih namo Iqlima.
”Aden pasan itu,” Mak Garembeh manjawek kato Upiak kadai.
Sambia manunggu Upiak kadai tibo, Mak Garembeh, Ajo Manih dan Sutan Bandaro sarato Da Boy maota lamak bancando urang lah lamo ndak basuo.
”Uda, iko pasanannyo,” Upiak kadai bakato sambia manyarahkan pasanannyo.
Alun jadi Upiak kadai pai, Mak Garembeh nan alah letay manahan litak langsuang protes sambia manunjuak ubi Abuih balomok keju tu.
”Apo ko Piak,” tanyo Mak Garembeh agak emosi
”Iko Kasiva Uda,” jawek Upiak kadai tanang.
”Kau pateakan Aden. Aden pasan Kasiva, kau anta ubi Abuih,” Mak Garembeh manjawek jo suaro tinggi.
”Iyo Piak, kawan ambo pasan Kasiva, kau agiah ubi abuih,” Ajo Manih pun tapanciang suganyo.
”Uda, Kasiva ko memang ubi abuih, tapi ubi abuih Thailand,” jawek Upiak kadai manjalehkan.
Mak Garembeh jo Ajo Manih nan mandanga jawek Upiak kadai tadiam Saribu baso sambia manggauik Kapalo.
”Ondeh, takicuah kawan den rupoe, Disangko makanan internasional, ubi abuih rupoe ” Sutan Bandaro nan ado di subarang meja galak takekeh kekeh.
Mak Garembeh nan kanai galak an, hanyo bisa galak sengeang.
Sutan Bandaro nan kagadangan hati bacarito pulo kejadian ko ka kawannyo, eh ruponyo kawannyo tu alah labiah dulu Kanai kicuah dek Kasiva.
Maliek kurenah urang batigo tu, Da Boy nan indak pernah galak, kecuali digalakkan. Takekeh gadang.
“Itu jan cangok, mantang-mantang litak, kasadoe disosoh. Untuang lai ubi abuih nyo anta. Kok tangkai tajam, baa kiro-kiro,” kato Da Boy diantaro galaknyo.
Mak Garembeh nan jadi objek penderita, hanyo bisa diam tanpa maresek Kasiva, eh ubi abuih tu. ***









